BBQ食得營　燒得型 (東網)

BBQ 想食得健康，食物又要燒得靚同均勻，其實都唔係好難啫。

好多人都想快啲凍，終於畀你恨到，周末冷峰到，氣溫會跌到攝氏16度，呢啲時候仲唔快啲約齊班 friend 去 BBQ？不過女仔最怕燒嘢食熱量高脂肪多，而男仔最驚係唔識拮嘢「吊吊揈」失禮晒女神！咪話唔醒你，出發前睇定呢個懶人包，有營養師 Krista 教你點食得健康，仲有燒烤達人麥師傅教點樣叉食物至穩陣，唔睇你蝕底。

【咁至食得營】

自行醃肉

市面上預先醃製的肉類，脂肪和鹽分都較高，建議大家自行用天然醃料醃肉，例如可將蒜頭加鹽、或把黑椒粒加入喼汁，可用以醃肉或塗麵包，一舉兩得。

薄塗蜜糖

燒到咁上下通常都會喺食物搽上蜜糖，但其實一茶匙的蜜糖已含20卡路里，不如考慮一些取替品，如用水把蜜糖調稀、選擇市面上蜜糖噴霧，也可減低蜜糖的攝取量。

謹選肉類

一些近骨位的肉類如雞翼、金沙骨、牛仔骨等，它們的脂肪含量都較高，扒類如牛扒、豬扒、或去皮的雞扒都是較好的選擇，以海鮮如蝦、蜆去代替肉類亦可。而丸類方面，以牛丸、蝦丸代替有餡的芝心丸、芝士腸，亦可減少脂肪的攝取。

切成小件

燒焦的食物含有致癌物質，所以燒烤時不妨將肉類切成薄片或小件，容易熟透之餘亦不會易於燒焦。另外亦可把肉上可見的脂肪切除，避免油脂滴到炭上，減少致癌物產生的揮發。

多吃水果

燒烤時可多吃些新鮮水果，如香蕉、奇異果、橙等，它們含有豐富維他命C，是天然的抗氧化物，可減輕致癌物質對身體的傷害。

無糖飲料

面對高溫火爐，自不然要飲下汽水或凍飲解渴，為免喝下大量高糖飲品，不防選擇低糖或無糖紙包飲品、樽裝涼茶等，又可自製檸檬梳打水、雪梨水、夏枯草以作解渴。

【咁至燒得型】

講完有營貼士，去到燒烤場又點搞呢？輪到燒烤達人麥師傅教大家叉食物嘅貼士，其實都大有學問架。

肉類篇

叉雞中翼時，雞翼的刀口要向着身體的方向，然後先挑皮叉入、再挑肉叉到最入位置，咁就夠穩陣。至於叉牛扒，是先將燒烤叉收窄，用單邊叉入牛扒的一邊，然後用另一邊叉拮入牛扒另一邊，翻轉後叉實牛扒頂部。

海產篇

如果是燒多春魚的話，可以直接將魚放在收窄了的燒烤叉上面燒，耐心地先燒香一邊，約燒5分鐘後，魚皮的油脂就會黏住燒烤叉，這時翻動，魚便不會跌下來。至於叉蝦就可一邊叉一隻，蝦頭對蝦頭。蝦頭向上，由蝦腳位直叉上蝦頭方向。燒的時候不要離火太遠，因為蝦離火燒會黏殼，所以宜近火不時轉動來燒，蝦肉就容易離殼兼肉爽。叉鱔時要留意燒烤叉要拮入鱔肉最厚身的位置，不要叉鱔皮，因皮會遇火收縮。鱔肉在高溫燒烤時釋出油分，且會黏住燒烤叉，此外翻動燒烤就不會吊吊揈。

蔬菜篇

食咗咁多肉，都要食番啲蔬菜平衡下，想食金菇的話，只要簡單加點牛油和生熟蒜蓉，以錫紙盤和錫紙包好，放在爐火中央燒15 分鐘便可。至於豆角，可以單邊叉插入豆與豆之間的豆莢，以細火來燒，燒約5分鐘。番茄就要預先切半插好，細火先燒茄肉一邊，再燒外皮一邊，約 5分鐘見外皮爆開便可以。最後不如來點水果，菠蘿連皮切件插在叉上，細火慢燒約3分鐘後，再放低炭火一點燒多2分鐘便成。