Krista營養師分享

  • 介紹俾大家 「纖瘦原隻蜆蒸滑蛋」
    …………
    材料: 原隻新鮮蜆、雞蛋
    做法:
    1. 先將洗淨嘅原隻新鮮蜆用水烚熟、 加少少鹽調味
    2. 將烚熟嘅原隻蜆連烚蜆嘅水以「一份蛋,兩份水」比例, 放入蒸爐用90度蒸30分鐘
    咁就成為健康又好味嘅「纖瘦原隻蜆蒸滑蛋」啦!

    提提大家:洗蜆嘅時候可以用多啲鹽擦個彀殺菌,之後用清水沖干淨。
    蒸爐用90度蒸係最好嘅,因此呢個溫度蒸出嚟嘅蛋係最滑同埋唔會起「水泡」咖。

     

  • 介紹俾大家 「 低脂忌廉蘑菇雞肉意粉 」

    材料: 去皮雞髀肉、鮮蘑菇、低脂忌廉、意大利粉

    做法:
    1. 先將意大利粉用水煮熟,備用
    2. 將去皮雞髀肉、鮮蘑菇切片, 之後 用鹽、香草醃味
    3. 用一茶匙油煎香切片雞髀肉,再加鮮蘑菇 一齊煎
    4. 加入意大利粉,麵粉水及低脂忌廉一齊煮
    咁就成為「 低脂忌廉蘑菇雞肉意粉 」la !

    全部材料都可以喺超級市場買得到咖:)

     

  • 28
    06月
    老少平安
    介紹比大家低油健康 「老少平安」

    材料:
    豆腐一磚、雞蛋一隻、鯪魚肉一碗、果皮、鹽調味

    做法:
    將材料順住同一個方向攪拌,之後放入蒸爐,用100度蒸6分鐘。
    咁就成為低油健康又好味嘅「老少平安」啦!

     

  • 介紹俾大家 「低脂嫩豆腐豬肉卷」

    材料:
    - 瘦豬肉片 (超級市場買得到)
    - 上等日本嫩豆腐 (超級市場買得到)製法:
    1. 用「醃肉4寶」 ( 豉油、豆粉、鹽、糖) 將瘦豬肉片醃好
    2. 將豆腐切成條狀,用醃好嘅瘦豬肉片包住
    3. 放入蒸爐蒸十分鐘
    4. 從蒸爐取出, 用易潔鑊加半茶匙油煎香兩邊就得咖啦!

    因為瘦豬肉片包住豆腐,雖然脂肪含量好低,入口時卻做到一種既香口又軟熟嘅豐富口感, 完全適合減緊肥嘅大家!

     

  • 今晚屋企煮「蒜蓉炒紫椰菜」食~~

    紫椰菜好有益咖,佢有豐富嘅維他命C, 維他命E同埋維他命B雜, 可以作為身體嘅抗氧化劑。 有抗衰老、 保持皮膚健康、 提高血液含氧量、 幫助燃燒體內脂肪、同埋預防感冒嘅效用。

    今晚我用咗蒜蓉炒。做法好簡單, 將切好嘅紫椰菜同埋蒜蓉,落一茶匙油中火炒就ok。 
    方便得嚟仲好好味tim~
    (想食嘅朋友唔駛周圍搵,我公司對住個街市就有紫椰菜賣架啦!)

     

  • 同大家分享 「健康小米菜飯」做法
    …………
    材料:
    小棠菜、小米、白米

    製法:
    1. 先將小唐菜烚熟,切碎備用
    2. 用電飯煲將白米同小米煮熟( 白米和小米比例:五比一)
    3. 等白米同小米煮熟後,同切碎咗嘅小棠菜混合
    咁就成為「健康小米菜飯」啦! 唔講大家唔知, 小米有好高鐵質同鈣質咖, 同埋白米一齊煮就夠晒健康啦!

    (小貼士: 小棠菜一定要先烚熟之後至同熟飯混合, 如果將生嘅小棠菜同生米放入電飯煲一齊煮嘅話,d小棠菜會出晒水,成煲飯會變得水汪汪咖。)

     

  • 「低油香草煎雞扒」 製法

    材料:
    去皮去骨雞扒(街市肉檔買得到)
    香草(超級市場買得到 )1.將已去皮去骨嘅雞扒洗淨,印乾水分
    2.用一茶匙生抽,半茶匙生粉,同香草醃5分鐘
    3.燒熱易潔鑊,落半茶匙油,中火煎雞扒
    三分鐘至金黃,反轉再煎三分鐘就可以上碟!

    咁就成為「低油香草煎雞扒」啦, 因為雞扒已經去皮,而且淨係用半茶匙油煎, 脂肪含量比出街食嘅雞扒真係低好多咖 

     

  • 材料: 
    鵪鶉蛋
    燒賣皮 (舊式麵檔有售)
    免冶梅頭肉
    雞蛋白
    冬菇(切粒)
    製法
    1. 將一隻雞蛋白和冬菇粒、免冶梅頭肉、適量鹽混合做成餡料
    2. 將餡料釀入燒賣皮
    3. 把已煮熟的原隻鵪鶉蛋放在燒賣上再放入爐蒸

    咁就成為健康嘅自家製低油鵪鶉蛋燒賣la !

     

  • 材料: 薯仔、鮮奶、幼鹽
    1. 首先將薯仔切開兩邊,放入蒸爐蒸 30 分鐘或以上,直至薯仔變淋
    2. 將蒸淋咗嘅薯仔剝皮
    3. 將薯仔切成細粒,混入熱鮮奶、幼鹽大力攪拌, 即至變成薯蓉 ( 沿同一個方向攪幾分鐘就搞掂 )
    咁就成為健康好味既自家製健康薯蓉啦! 煮多少少同鍾意既人一齊分享,真係又健康又有新意!

     

  • 介紹比大家 – 「低油豆豉辣椒炒蜆」

    材料: 豆豉, 蒜頭, 辣椒,新鮮蜆
    製法: 
    1. 先將豆豉,蒜頭,辣椒切碎做調味料
    2. 用一茶匙油炒一炒調味料
    3. 將洗乾淨嘅蜆同d調味料,加入少少水煮5分鐘
    咁就成為低油又好味嘅「低油豆豉辣椒炒蜆」啦!